Commons:Wiki Jerdi Súyedi 2024/Qaǵıydalar
Jump to navigation
Jump to search
Wiki Loves Earth 2024 |
Participating countries |
Rules and FAQ |
Organise |
Winners |
Contact us |
Report |
Bul qaǵıydalar toplamı Wiki Jerdi Súyedi 2024 tańlawınıń xalıqaralıq basqıshı ushın ámel etedi. Jergilikli shólkemlestiriwshiler óz qaǵıydalarına ámel etiwi múmkin biraq xalıqaralıq basqıshqa shıǵarılǵan súwretler usı bette jazılǵan qaǵıydalarǵa sáykes keliwi kerek.
Qaǵıydalar
"Wiki Jerdi Súyedi" fototańlawında qatnasıwshı súwretler tómendegi talaplarǵa sáykes keliwi kerek:
- Súwretti júklegen paydalanıwshı onı ózi súwretke alǵan bolıwı kerek
- Tańlaw ushın júklengen barlıq fotografiyalar túp nusqa bolıwı hám súwretke alǵan avtor tárepinen júkleniwi talap etiledi. Avtor bolmaǵan shaxs tárepinen júklengen fotografiyalar (olar hátte Wikiqoyma talaplarına sáykes keliwshi ruxsatnama menen júklengen bolsa da) tańlaw ushın qabıl etilmeydi.
- Avtor tárepinen tańlaw dawamında júkleniwi kerek;
- Siz hátte tańlaw baslanıwınan talay aldın ózińiz túsirgen suwretlerdi de júklewińiz múmkin. Áhmiyetlisi, súwretler tańlaw dawam etip atırǵan waqıt aralıǵında júkleniwi kerek (hárbir mámleket óz jergilikli tańlawın may, iyul ayları aralıǵında ótkeredi).
- Erkin licenziya tiykarında daǵaza etiliwi kerek;
- Onda identifikaciyalanǵan tábiyat esteligi, tábiyiy baǵ, qorıqlanatuǵın tábiyiy aymaq hám t.b.lar súwretlengen bolıwı kerek;
- Joqarıdaǵı talapqa mas keliwshi aymaqlar dizimi hárbir qatnasıwshı mámleket tárepinen daǵaza etiledi. Talaplarǵa mas aymaqlarda alınǵan úlgidegi túrler (haywanlar, ósimlikler hám t.b.) súwretleri, eger tańlaw shártlerine sáykes anıqlıqta alınǵan bolsa, tańlaw ushın qabıl etiledi.
- Fotografiyalar koordinatalarǵa hám súwretlengen tábiyat esteligi haqqındaǵı anıq túsindirmege iye bolıwı kerek.[1]
- Milliy (jergilikli) tóreshiler quramı tárepinen nominaciyaǵa qoyılǵan bolıwı kerek;
- Eń keminde 2 megapiksel (Mpx) keńeytpege (sapaǵa) iye bolıwı kerek.[2]
- Qatnasıwshı óz profili sazlamalarında elektron pochta mánzilin tastıyıqlaǵan bolıwı kerek.
- How to upload
- Find the detailed instructions on how to upload your image for the Wiki Loves Earth contest.
Ózgerisler
Zárúrshilik tuwılǵan payıtta xalıqaralıq tóreshiler quramı qaǵıydalarǵa ózgeris kirgiziwi múmkin. Talqılaw usı jerde alıp barıladı: Commons_talk:Wiki_Loves_Earth_2024/Rules.
Kóp beriletuǵın sorawlarǵa juwaplar
- COVID-19 pandemiyası sebepli súwretke alıw ushın tábiyat esteliklerine barıw qıyınlastı, bul jaǵdayda ne qılıw kerek?
- Bunday jaǵdayda biz sizge ózińiz tárepińizden aldınlaw túsirilgen súwretti júklewdi máslahát beremiz. Ótinish, mámleketińizde engizilgen sheklewlerge ámel etiń, qáwipsizligińiz hám salamatlıǵıńızdı asrań. Jáhánde bolıp atırǵan waqıyalarǵa biziń múnásibetimizdi oqiń.
- Júklew múmkin bolǵan fotografiyalar sanı sheklengen be?
- Shegaralanbaǵan, siz qálegenińizshe fotografiya júklewińiz múmkin. Ayırım paydalanıwshı júzlegen aymaqlardıń súwretin júkleydi. Ne bolǵanda da, jeńimpazlıqqa dawa etiwińiz ushın biz sizge eń jaqsı sapadaǵı súwretti júklewdi máslahát beremiz.
- Photoshop yamasa soǵan uqsas programmalarda redaktorlanǵan súwretlerdi de júklesam bola ma?
- Boladı. Súwretler qálegen baǵdarlama járdeminde redaktorlanǵan bolıwı múmkin biraq redaktorlaw baǵdarlamaları járdeminde súwretlerdi qayta islewden saqlanıń: bul fotografiya tańlawı, sanlı kórkem-óner tańlawı emes.
- Súwret ólshemleri qanday bolıwı kerek?
- Ótinish, súwretlerdi múmkinshiligi barınsha sapalı keńeytpede júkleń, olardı "internet ushın" kishireytirmeń. Biz túrli maqsetler, hátte baspadan shıǵarıw ushın mas keliwshi joqarı sapalı súwretlerdi qádirleymiz. Solay eken, 2 megapikselden tómen sapalı bolǵan fotografiyalar jergilikli basqısh ushın qabıl etiliwi múmkin, biraq xalıqaralıq basqıshta sıylıqlı orınlarǵa dawa ete almaydı. Sebebi, olar úlkenlestirilgende sapasın joǵaltadı, ásirese, baspadan shıǵarǵanda. Ótinish, umıtpań, biz sizge baylanısqa shıǵıp joqarıraq sapadaǵı súwretti júklewińiz kerekligin aytpaymız.
- Wikipediadaǵı qanday da bir súwretsiz maqalanı redaktorlap, ózim júklegen súwretti maqalaǵa kiritip qoyıwım múmkin be?
- Álbette, biz bunnan tek quwanıshlı bolamız! Siz Wikiqoymaǵa júklegen súwretlerdi Wikipediada da ańsat ǵana sáwlelendiriw múmkin.
- Men onsha jaqsı fotograf emespen. Sizge báribir men alǵan súwret kerek pe?
- Awa, márhámát! Siz xalıqaralıq basqıshta uta almasańız da, biz sizdi óz átirapıńızdaǵı tábiyat esteligin súwretke alǵanıńızdan hám onı keleshek áwladlarǵa qaldırıp atırǵanıńızdan minnetdar bolamız. Bunnan tısqarı, jergilikli shólkemlestiriwshiler kem sanlı júklengen súwretler ushın arnawlı nominaciyalar hám/yamasa sıylıqlar engiziwi múmkin.
- Aymaqlar júdá úlken, súwretke alıp atırǵan waqıtta tiykarǵı itibardı nege qaratqan maqul?
- Keń tábiyat kórinisilerin hám xarakterli biotoplardı ózinde sáwlelendirgen súwretler eń ǵalabalıq fotografiyalar taypasına kiredi. Sonday-aq, siz qorıqlanatuǵın aymaqlarda túsirilgen xarakterli yamasa kem ushraytuǵın túrler (jánlikler, ósimlikler, hám t.b.) súwretlerin de júklewińiz múmkin biraq bul súwretler durıs rásmiylestirilgen bolıwı kerek. Bunday súwretlerdi júkler ekansiz, sizden súwretke anıq túsindirme jazıw talap etiledi. Shólkemlestiriwshiler siz bul súwretti kimnińdir balkonında emes, áyne qorıqlanatuǵın aymaqta alǵanıńızǵa isenim kámil etiwi lazım.
- Jergilikli tańlawlarda koordinatasız súwretler qabıl etiledi me?
- Awa, jergilikli basqıshta súwretlerdi koordinatasız júklew múmkin biraq bul súwret xalıqaralıq basqıshqa shıǵatuǵın bolsa, avtor yamasa shólkemlestiriw toparı bul súwretke koordinata qosıwı kerek boladı, bolmasam bunday súwretler tańlawdan shetlestiriledi. Geyde koordinatanı qosıw ańsat (eger ol belgili, ǵalabalıq orın bolsa) biraq mudamı da emes. Sonı biliń, xalıqaralıq basqısh tóreshiler quramı aǵzaları barlıq koordinatasız fotografiyalardı waqtında anıqlay almaydı, súwrettiń tańlaw qaǵıydalarına muwapıqlıǵın anıqlawda qıyınshılıqqa dus keledi.
- Meniń kameram koordinatalardı avtomatikalıq túrde kiritpeydi
- Biz (wikipediashılar sıpatında) súuwretke imkanı barınsha anıq koordinata kiritiliwi tárepdarı bolsaq ta, buǵan erisiw mudamı da ańsat emesligin túsinemiz: kimdir aldın barǵan ornınan alǵan birden-bir baspadan shıǵarǵan súwretti skanerlewi múmkin yamasa eskirek qurılmada súwretke alǵan bolıwı múmkin. Bunday jaǵdayda, qorıqlanatuǵın aymaqtıń bir bóleginen yamasa aymaqtı tolıq ishine alatuǵın koordinatanı kirgiziw jetkilikli (ádette bul aymaqtıń oraylıq bólegi boladı).
- Koordinata kirgiziwim qorǵawǵa alınǵan túrlerge qáwip tuwdırıwı múmkin, bunday jaǵdayda ne islewim kerek?
- Qorıqlanatuǵın túrlerdi qorǵaw maqsetinde koordinatalardı óshiriw zárúrshiligi payda bolsa, ol halda jergilikli shólkemlestiriwshiler wle-team
wikimedia.org.ua pochta mánziline bul haqqında maǵlıwmat hám buǵan tiykarın jiberiwi kerek.
- Ayırım tábiyiy aymaqlarǵa kiriw pullı bolsa ne qılıw kerek?
- Pullı aymaqtan súwret jibergen fotograflar da hámme qatarı bahalanadı. Biz heshkimdi súwret alıw ushın pul tólep kiriwge májbúr etpeymiz. Basqa tárepten alıp qaraǵanda, súwret alıw ushın pul tólep kiretuǵın insanlar tańlawsız da bul isti qıla beredi, solay eken, biz olarǵa ol jerde súwretke alıwdı máslahát beremiz.
- Tańlaw ushın flora, fauna yamasa basqa tábiyiy obiektlerdiń (máselen, úńgirler hám jaǵalar) súwretleri de mas keledi me?
- Bul tábiyiy obiektler tábiyat miyrası ekosistemasınıń zárúrli bólegi bolıp tabıladı. Eger olar tábiyat esteligi aymaǵında alınǵan bolsa, biz sizge onı júklewdi máslahát etemiz. Itibar beriń, eger siz júklegen súwrette anıq bir jerdiń ápiwayı obiekti sáwlelengen bolsa, bul túr identifikaciyalanǵan bolsa hám súwret koordinataǵa iye bolsa, siz jeńimpazlar qatarında bolıwıńız múmkin.
- Óz súwretlerime suwbelgi qoyıwım múmkin be?
- Qaǵıydalarımız boyınsha suwbelgili súwretlerdi júklew qadaǵan etilmegen, biraq olardıń jeńimpaz bolıw múmkinshilikleri tómenlew. Itibarǵa alıń, eger suwbelgili súwretińiz jeńimpazlıq ushın tańlap alınsa, sizden bul súwretti qayta, suwbelgisiz variantın júklew soralıwı múmkin. Siz suwbelgiden paydalanıw haqqındaǵı maǵlıwmatlardı Wikiqoymadaǵı usı silteme arqalı ótip bilip alıwıńız múmkin.
- Burınǵı tábiyat esteliginde alınǵan súwretler de tańlaw ushın qabıl etiledi me?
- Burınǵı tábiyat esteliklerin tańlawǵa qosıw máselesi jergilikli basqısh tóreshileri tárepinen sheshiledi. Ótinish, hárbir qatnasıwshı mámleket ushın daǵaza etilgen dizimdi tekseriń. WJS xalıqaralıq tóreshiler quramı bunday jaǵdaylarǵa qarsı shıqpaydı. Tańlawdan tiykarǵı maqset te tábiyatqa, onıń saqlanıwı zárúrligine insanlar itibarın qaratıw hám tábiyat estelikleriniń erkin maǵlıwmatlar bazasın qáliplestiriw (bunda burınǵı tábiyat estelikleriniń súwretleri de kirgiziliwi múmkin).
- Men júklegen súwretlerden neshewi xalıqaralıq basqıshta jeńimpaz bola aladı?
- Xalıqaralıq basqıshtıń eń kúshli 20 lıǵına bir avtordıń kóbi menen eki súwreti tańlap alınıwı múmkin. Biziń maqsetimiz — jeńimpaz súwretler qatarın keńeytiw hám túrli aymaqlar hám avtorlardan kóbirek tábiyat estelikleriniń súwretlerin ǵalabaǵa kórsetiw. Usı jıldan biz sonday qarar qabılladıq.