Pusat Dokumentasi jo Informasi Kebudayaan Minangkabau

Examples

---

All media files (401)

Pusat Dokumentasi jo Informasi Kebudayaan Minangkabau atau PDIKM adolah salah satu museum di Sumatera Barat nan barado di Kota Padang Panjang. Museum iko narisi banyak informasi jo koleksi kebudayaan Minangkabau, baiak dokumentasi audio atau visual.

Sijarah pandirian

Nan manjadi lasan utamo pandirian PDIKM iko salah satunyo adolah adonyo pandapek bahwasonyo urang Minangkabau indak punyo bukti-bukti sijarah nan tatulih nan baiak, dek karano urang Minang tabiaso jo budaya tutua nan diturunkan turun tamurun; padahal kanyatoannyo memang banyak dokumentasi tantang Minangkabau labiah banyak ditamui di lua Minangkabau, misalnyo di Museum Nasional Indonesia, Jakarta atau Museum Leiden, Belanda. Samangaik untuak malangsuangkan jo mandakekan dokumen tantang Minangkabau jo urang Minangkabau tu surang, Bustanul Arifin, Mantan Menteri Koperasi Republik Indonesia wakatu maso Orde Baru, mandirikan lembaga non-profit barupo tampek untuak mangumpuan sado dokumen jo informasi tantang kebudayaan Minangkabau. Abdul Hamid nan salamo hiduiknyo mangabdi untuak pandidikan di Sumatera Barat, dimintak untuak mandirikan lembaga iko, dan akhianyo pado tanggal 8 Januari 1988 didirikanlah Yayasan Dokumentasi jo Informasi Kebudayaan Minangkabau (YDIKM)

Sairiang bajalannyo wakatu, kasapakaikan Yayasan Dokumentasi dan Informasi Kebudayaan Minangkabau jo Pamarintah Kota Padang Panjang mako nan manguruih PDIKM dialiahkan dari YDIKM ka Pamarintah Kota Padang Panjang yaitu Dinas Pemuda Olahraga Kebudayaan danPariwisata. Tujuannyo untuak manjamin panguruihannyo nan labiah baiak, nbaiak sacaro materi, manajemen, maupun sumber daya manusia nan manguruihnyo.

Koleksi

• 1.900 jilid salinan buku jo majalah nan tabik sabalun tahun 1942;
• Kiro-kiro 1.500 judul buku nan tabik sasudah tahun 1950 sumbangan masyarakaik jo satumuak gadang kliping bamacam koran jo majalah;
• 90 album foto;
• 500 foto dalam bingkai gadang jo ketek;
• 142 reel mikrofilm positif, isinyo barupo naskah-naskah lamo, koran-koran nan tabik sabalun Parang Dunia II, dan lain lainnyo; untuak mambaco mikrofilm iko PDIKM alah punyo alaik baco mikrofilm 35 mm positif atau negatif langkok jo alaik panunjang lainnyo.
• Labiah kurang 600 kaset nan isinyo mulai dari nyanyian cerito klasik Minangkabau sarupo saluang, rabab, dan sebagainyo sampai lagu pop Minang;
• Babarapo tiruan alaik musik tradisional Minangkabau.

Karajo samo Wikimedia jo PDIKM

Wakatu Wikimedia Indonesia maajak karajo samo untuak mandigitalkan naskah-naskah, PDIKM satuju untuak mambukak baratuih naskah-naskah nan tasimpan didalamnyo. Akhianyo sampai ado panandatanganan janji karajo samo jo mamulai digitalisasi. Sarupo babarapo museum lainnyo diIndonesia, PDIKM punyo baribu lembar salinan majalah jo naskah Minangkabau jo budaya satampek nan bisa mampakayo isi di internet malalui digitalisasi iko.

Salah satu koleksi nan alah didigitalisasi dari PDIKM adolah Majalah Aboean Goeroe-Goeroe.

Paralunyo koleksi PDIKM di Commons

Kiniko, banyak sarobok naskah-naskah Minangkabau di Internet dalam lisensi bebas nan mamudahan pangguno dari Indonesia ataupun dari lua nagari nan nio mampalajari Minangkabau, mancaliak koleksi-koleksi itu. Wikimedia Indonesia barusaho mambaok naskah-naskah nan hak ciptanyo alah indak balaku lai ka internet. Harapannyo naskah-naskah itu dapek membangkikan namo Minangkabau nan baagamo jo babudayatimur ka internet nan laweh. Iko lanjuiknyo manyamangaikan anak mudo Minangkabau supayo labiah mancintoi jo manjago budayonyo baiak-baiak supayo dapek dilanjuikan ka maso barikuiknyo kamuko.

Manyigi koleksi PDIKM

Untuak manyigi koleksi PDIKM nan alah didigitalisasi, sila kunjuangi Category:Scanned from Minangkabau Culture Documentation and Information Center.

Jam Gadang di Bukittinggi sebelum 1942

Kaba

• Liputan media
  • Kabar Express: Dinas Pariwisata Padang Panjang MoU dengan Wikimedia Indonesia
  • Klik Positif: Wikimedia Indonesia Digitalisasi PDKIM Padang Panjang