File:WIKITONGUES- Pietro speaking Lombard.webm

Italiano: Bondì a tucc! Mì se ciami Peder ("Pietro" in Italian) e son dree a parlavv in Lombard. El Lombard che l'è... cosa l'è 'l Lombard?, disarii vialter; el Lombard l'è ona lengua neolatina ocidental (compagn del Frances, del Spagnoeul, del Portoghes, del Catalan...) che l'è parlada in d'un gross tocch de l'Italia del Nord. Disemm, per vess pussee precis: in de la Lombardia (oviament), in del Piemont oriental, in d'un tocchellin del Trentin e in tutta la Svizzera italiana (donca Canton Tesin e un tocch del Canton Grison).

Donca l'è parlada in d'un bell tocch de terra. Purtropp al dì d'incoeu l'è dree a sparì. Perchè? Perchè i sgent che le parlen i sann nò, i creden nò che la sia una lengua: pensen che la sia domà un "dialett"; e 'l dialett l'è un termen, una parolla che chì in Italia la g'ha minga un significad positiv, perchè gh'è la "lengua" e gh'è 'l "dialett". E 'l dialett l'è, purtropp, una "lengua de serie B", e donca la g'ha nò importanza, pu de tant. L'è considerada una lengua del passad, una lengua de vegg, una lengua anca un poo "razzista", purtropp: una lengua per sarrass su in del sò restell inveci che derviss al mond. Donca purtropp al dì d'incoeu el Lombard l'è parlad semper meno: e soratutt, quell che l'è pussee grav l'è che i nonni e i pader ghe parlen minga in Lombard ai sò nevod e ai sò fioeul. E donca se ris'cia che tra una quai desena d'agn el Lombard el sarà rivad a l'estinzion.

Mì pensi che 'l sia proppi un peccad, per tante reson. Prima de tutt perchè l'è sbajad pensà che 'l sia un dialett, e che ghe sien di lengove de serie A e de serie B: l'è una roba che la sta minga in pee. E poeu perchè pensi che 'l sia sbajad, che la sia proppi una desgrazzia fà morì una lengua che la g'ha un valor coltural: e numm in Italia semm quanto l'è importanta la coltura, ma anca una lengua l'è coltura, e minga domà la lengua de Statt, ma anca la lengua regional.

E donca mì hoo scominciad un quai ann fa prima de tutt a imparà el Lombard, perchè mì el savevi nò: mì parlavi domà italian (e lo parlo anche abbastanza bene, diciamo, essendo madrelingua italiano). L'hoo imparad che seri sgiamò grand. E poeu hoo taccad a scrivel, e donca mì tucc i dì scrivi e proeuvi a parlà in Lombard (per quell che poeudi) per cercà de tegnì viva quella lengua chì. Perchè l'unega manera per tegnì viva una lengua l'è parlalla, l'è dopralla in tutte i ocasion che se pò: provà a parlalla.

E mì la parli, anca denanz a una videocamera che la me pò minga respond. Però, insomma, mì credi che la sia 'na bataja giusta e la sia 'na bataja bella e che la val la pena combattela. E donca voo inanz e speri che insemm a mì ghe sarà tanta oltra sgent. Gh'è sgiamò un poo de sgent che l'è dree a combatt per el Lombard, e per tutte i oltre lengove d'Italia, perchè gh'è anca el Piemontes, el Sicilian, el Napoletan... e via inscì. Però mì speri che ghe ne sarà anmò pussee. E speri che con quell video chì un quai olter el poeuda interessass a la quistion lenguistega italiana, perchè pensi che la sia proppi vun di lavorà pussee important e pussee bei per el mè paes, che l'è l'Italia per la mia region, che l'è la Lombardia per la mia citaa, che l'è Milan

Donca inanz inscì (almeno per mì: poeu, speri che anca i olter...)! Ciao!