Category:Dingaanstat Sendingstasie

Afrikaans: Die NGK Sendingstasie Dingaanstat is geleë op Hlomo amabutho, Dingaan se eertydse paradegrond, wat in 1944 deur Hennie van Rensburg aan die kerk geskenk is. D.m.v. die Geestelike Eeufeesmonumentfonds wat met die 1938-eeufees beslag gekry het, kon die NGK Leeukop-plaas op 25 Sep. 1954 aan Dingaanstat oordra, en is begin om evangeliste en later leraars op te lei. Die direksie het ook nabye Volksmonumente behartig. Die Sendingstasie sou sigbaar gestalte gee aan die Retief-voorval en evangeliese versoening tussen Zoeloe en Afrikaner. Ds. J.C.G. Kotze het 'n geestelike eeufeesmonument voorgestel vir Zoeloe-kerstening, en argitek Paul Roux van Stellenbosch het die kerk ontwerp met o.m. Bolandse boumateriale en sitplek vir 450 mense. Die rietdakkerk is op 14 Des. 1969 deur prof. P.P. Stander ingewy, maar is tydens politieke onrus van die 1980’s afgebrand, toe net die 23 m hoë betonkruis-kloktoring staande gebly het.[1][2] In 1937/1838 het die sendeling Francis Owen en sy tolk Richard B. Hully hier kampeer.