File:2022-08-25 Funeral at Jardim dos Herois e Martire da Patria, Aileu.jpg

Tetun: 𝗣𝗿𝗶𝗺𝗲𝗶𝗿𝘂-𝗠𝗶𝗻𝗶𝘀𝘁𝗿𝘂 𝗧𝗮𝘂𝗿 𝗠𝗮𝘁𝗮𝗻 𝗥𝘂𝗮𝗸 𝗣𝗿𝗲𝘇𝗶𝗱𝗲 𝗦𝗲𝗿𝗶𝗺𝗼́𝗻𝗶𝗮 𝗢𝗻𝗿𝗮 𝗙𝘂́𝗻𝗲𝗯𝗿𝗲 𝗯𝗮 𝗠𝗮́𝗿𝘁𝗶𝗿𝗲𝘀 𝗟𝗶𝗯𝗲𝗿𝘁𝗮𝘀𝗮𝘂𝗻 𝗡𝗮𝘀𝗶𝗼𝗻𝗮́𝗹 𝗶𝗵𝗮 𝗠𝘂𝗻𝗶𝘀𝗶́𝗽𝗶𝘂 𝗔𝗶𝗹𝗲𝘂

✅ 𝐿𝑜𝑟𝑖 𝑆𝑖𝑟𝑎 𝑁𝑎𝑠𝑎𝑢𝑛 𝑀𝑜𝑟𝑖𝑠, 𝐿𝑜𝑟𝑖 𝑆𝑖𝑟𝑎 𝐼𝑡𝑎 𝑀𝑜𝑟𝑖𝑠 𝗔𝗶𝗹𝗲𝘂, 𝗹𝗼𝗿𝗼𝗻 𝟮𝟱 𝗳𝘂𝗹𝗮𝗻 𝗮𝗴𝗼𝘀𝘁𝘂 𝘁𝗶𝗻𝗮𝗻 𝟮𝟬𝟮𝟮 – Sua Eselénsia Primeiru-Ministru Taur Matan Ruak, kinta ne’e, prezide Serimónia Onra Fúnebres ba restu mortais Mártires Libertasaun Nasionál nian na’in 70 iha Jardim Eroi no Mártires ba Pátria, iha Munisípiu Aileu, ne’ebé organiza hosi Ministériu Asuntus Kombatente Libertasaun. Iha Intervensaun, Xefe Governu hateten eroi sira ne’ebé mate ruin naklekar tanba ho palavra de ordem ida dehan “Mate ka moris ukun rasik na” ne’ebé sai determinante ba timoroan sira feto no mane hamriik hodi reziste hasoru okupasaun ilegál hosi domin estranjeiru tanba lakohi t rai seluk mai hadau ita nia rain, nu fim tenke lakon ema rihun 200 resin, no liu tiha tinan 47 konsege Estadu halót filafali sira balun ne’ebé família hetan sira nia restu mortais tantu iha Aileu no iha fatin sira seluk iha territóriu laran.

“Tinan 47 liu ba ita nia lider sira soe liafuan ida hateten Mate ka Moris Ukun Rasik An”, kuandu fó sai liafuan ne’e hateten buat rua, ida katak ita determinadu loos,  atu funu hasoru ita nia funu maluk, ida seluk hateten katak,  ita la interese nia presu saida de’it, ita prontu atu fó, depois  tinan 47 liu ita seidauk hakoi hotu  ita nia mate  sira,  ne’e hatudu katak la’ós uitoan, besik rihun atus 2 mak mate, lisaun ida ba it- nia povu mak ita nia determinasaun, se de’it  mai husi ne’ebé de’it, hakarak hadau ita nia rain, ita sei la hakrúk ba sira, ita sei banati tuir sira uluk nia ain fatin i jerasaun ba jerasaun sei tuir ida ne’e, tanba kada povu kada nasaun, nia  konkista rasik nia espasu iha mundu, konkista rasik nia lian iha mundu, ema la fó ita iha bandeja, tanba ne’e ita dehan lori sira nasaun moris, lori sira ita moris, ita hotu terus nasaun  tomak terus balun uitoan balun barak, maibé liu-liu sira ne’ebé nia oan sira ba soi rai ida ne’e, obrigadu barak sira la mate saugati, sira nia mate iha folin todan  hanesan Ramelau, hanesan Matebian hanesan Kabelak”, dehan  Xefe Governu iha Intervensaun.

Eis Xefe Estadu Maior FALINTIL hatutan, Governu liuhosi Ministériu Asuntu Kombatente no Libertasaun Nasionál, sei kontinua kria kondisoins atu halót restu mortais sira iha fatin sira seluk, ne’ebé seidauk halót, tanba ne’e obrigasaun ida oinsá halót heróis sira ne’ebé sakrifika an ona sira nia vida ba nasaun. Iha biban refere, Xefe Ezekutivu mós husu ba timoroan sira atu kontinua banati tuir eroi sira nia espíritu ne’ebé husik hela ona Nasaun ida, hodi hamutuk oinsá kontribui ba prosesu dezenvolvimentu nasionál hodi hasai ita nia povu husi kiak no mukit. “Ita sira ne’ebé moris tebes kontinua banati nafatin tuir sira nia ezemplu, la fasil mais kada ita ida-idak halo reflesaun hodi hanoin katak buat ida halibur ita, mak ita-nia nasaun no ita-nia povu, buat ida halibur ita mak interese ita- nia nasaun nian. Aileu ohin se ita-boot sira lembra sei hanoin kona karik iha tinan 47 ba kotuk iha fulan agostu duni mak ita hahú iha Aileu, tinan 47 liu, fulan agostu mak ita haloot maun alin sira ne’e, ita husu sira kontinua tulun ita nafatin, tulun ita nia rain, tulun ita-nia oan no bei-oan sira para ké hetan kbiit, hetan forsa atu kontinua kontribui ba ita-nia dezenvolvimentu ita-nia nasaun nian”, tenik. Serimónia fúnebre refere, hahú ho misa no fó bensaun ba kampa no kaixaun restu mortais sira nian. Hola parte iha serimónia refere, Prezidente Tribunál Rekursu, Juis, Deolindo dos Santos, membru Governu sira, Autoridade sivíl no militar Munisípiu Aileu nian, membru Parlamentu Nasionál, Eis Xefe Estadu Maior F-FDTL, Tenente Jenerál Falur Rate La’ek, Reprezentante Komandu F-FDTL, reprezentante órgaun rezisténsia, no família mártires sira nian. 𝐇𝐎𝐓𝐔

1. 𝐌𝐞𝐝𝐢𝐚𝐆𝐏𝐌